ཡ་ཧུ་དྰ་པའི་སློབ་གསོའི་མན་ངག

སྤྱིར་བཏང་དུ་སྐད་དང་ཡི་གེ་ཆོས་ལུགས་དད་མོས་འཚོ་བ་གོམས་གཤིས་སོགས་ནི་སོ་སོར་ཐུན་མིན་དུ་སྣང་ཡང་། འཇིག་རྟེན་གནས་ལུགས་ཐད་ཀྱི་རིན་ཐང་ལྟ་ཚུལ་དང་སྤང་བླང་འཇུག་ལྡོག་བྱེད་ཚུལ་ནི་མི་རིགས་དང་རིག་གནས་བྱེ་བྲག་པར་མ་བལྟོས་པར་ཐུན་མོང་སྤྱི་འགྲོས་སུ་སོང་བ་ཤས་ཆེ་བར་མཐོང་། རིག་གནས་ཞེས་པ་དང་སློབ་གསོ་ཞེས་པའི་དམིགས་གཏད་ཀྱི་ཡུལ་ཀྱང་བྱེ་བྲག་གི་སྐྱེ་བོ་རེ་རེའི་མི་ཚེ་དེ་ཤེས་རབ་གྱིས་ཟིན་པ། བཟང་པོ་སྤྱོད་པས་ཕྱུག་པ། རྩིས་མཐོང་ཆེ་བས་འཚོ་བ་འབའ་ཞིག་ལས་མ་འདས། དེས་ན་གང་དག་ལ་དེ་ཕྱོགས་ཀྱི་ལེགས་པའི་ཡོན་ཏན་ཅི་འདུག་རང་ཉིད་ཕུན་སུམ་ཚོགས་པའི་རྒྱུ་དང་རྐྱེན་དུ་འདྲེན་པ་ལ་ཁོག་ཡངས་བློ་སྤོབས་བསྐྱེད་རྒྱུ་ནི་དེང་གི་དུས་སུ་འུ་ཅག་ལ་མཚོན་ན་ལྷག་པར་དུ་གལ་ཆེན་པོ་རེད་དོ་སྙམ། དེ་ལྟ་བས་ན་འུ་ཅག་གི་དཔེ་ལྟོས་སུ་གྱུར་པའང་འཛམ་གླིང་སྒང་འདིར་གྲངས་ཀྱིས་མི་ཟིན་པ་འདུག་ན་ཡ་ཧུ་དཱ་པ་ནི་དེ་དག་ལས་ཀྱི་ཁྱད་པར་དུ་འཕགས་ཤོས་ཡིན་ནོ་ཞེས་དང་། ཡ་ཧུ་དཱ་པའི་སློབ་གསོའི་བསམ་བཞག་དང་ཚུལ་རྣམ་ཅི་རིགས་འཛམ་གླིང་བྱིངས་ཆེའི་མིག་ལྟོས་སུ་སོང་བའི་རྒྱུ་མཚན་གྱིས་དཔེ་དེབ་འདིར་ཡ་ཧུ་དཱ་པའི་སློབ་གསོ་ལས་ཀྱི་བྱིས་པའི་སློབ་གསོའི་སྐོར་ཁོལ་བཀར་དུ་བསྒྲིགས་ཡོད་འདུག

དཔེ་དེབ་འདི་རུ་ཕ་མར་གྱུར་པ་དག་དང་དགེ་རྒན་གྱི་ལས་ཁུར་པ་དག་ལ་དམིགས་གཏད་དེ་ཡ་ཧུ་དཱ་པའི་གཏམ་རྒྱུད་ལྔ་བཅུར་ཉེ་བ་བསལ་འདེམས་སྒྱུར་སྒྲིག་བགྱིས་འདུག་པ་རེ་རེ་ནས་གནས་ལུགས་ཟབ་མོ་ཁ་གསལ་གོ་བདེར་སྦྱར་འདུག་པ་དང་།  རྡོག་དོན་བྱིས་པའི་གནས་སྐབས་ནས་བཟུང་སྟེ་ཤེས་རབ་བསྐྱེད་ཅིང་བསྲིང་བ་དང་བཟང་པོ་སྤྱོད་པས་རྒྱུད་སྨིན་པར་བྱེད་པའི་ཉེར་བསྡོགས་སྔོན་དུ་འགྲོ་བར་ཐབས་ཤེས་བརྩོན་གསུམ་ཇི་ལྟར་བསྟེན་ཚུལ་གཏམ་རྒྱུད་གསོན་ཉམས་ཅན་ལ་སྦྱར་ཅིང་འཆད་བདེ་ཉན་སྤྲོ་ཅན་དུ་བྱས་ཡོད་འདུག་ན། འདིས་ཀྱང་འུ་ཅག་ཕ་མ་དང་དགེ་རྒན་རྣམས་ཀྱིས་བྱིས་པའི་ཕྱི་ནང་དོན་ལྡན་དུ་བྱེད་པའི་སློབ་གསོ་གཏོང་བར་སོ་སོར་ཕྱར་བ་གྲུ་འདེགས་ཀྱི་ཕན་རླབས་ཐོན་ངེས་པར་གདོན་མི་ཟའོ། །